Blog

پاکستان کو گزشتہ دو دہائیوں سے جس سب سے بڑے چیلنج کا سامنا ہے، وہ سرحد پار دہشت گردی ہے۔ یہ محض چند واقعات یا وقتی حملوں کا سلسلہ نہیں بلکہ ایک منظم، مربوط اور بیرونی سرزمین سے چلنے والی کارروائیوں کا جال ہے جس کا مقصد پاکستان کے امن، ترقی اور استحکام کو متاثر کرنا ہے۔ بالخصوص مغربی سرحد پر پیدا ہونے والی صورتِ حال نے ریاستی اداروں کو مجبور کیا کہ وہ دفاعی حکمتِ عملی کو ازسرِنو مرتب کریں اور دشمن کے ناپاک عزائم کو ناکام بنانے کے لیے مؤثر اور بروقت اقدامات کریں۔
گزشتہ چند برسوں میں خیبر پختونخوا اور بلوچستان میں دہشت گردی کے واقعات میں جو اضافہ دیکھنے میں آیا، اس کے تانے بانے سرحد پار موجود ٹھکانوں سے ملتے رہے۔ ان حملوں میں نہ صرف سکیورٹی فورسز بلکہ معصوم شہری بھی نشانہ بنے۔ پاکستان نے ابتدا میں سفارتی ذرائع کو ترجیح دی، بارہا افغان عبوری حکومت کو قابلِ تصدیق انٹیلی جنس شیئر کی، شواہد فراہم کیے اور مطالبہ کیا کہ اپنی سرزمین پاکستان کے خلاف استعمال نہ ہونے دی جائے۔ تاہم جب ان شکایات کا ازالہ نہ ہوا اور دہشت گردوں کی محفوظ پناہ گاہیں بدستور فعال رہیں تو پاکستان کو اپنے دفاع کا حق استعمال کرنا پڑا۔
بین الاقوامی قانون اور اقوامِ متحدہ کے چارٹر کے آرٹیکل 51 کے تحت ہر ریاست کو اپنے دفاع کا حق حاصل ہے۔ جب کسی ملک کی سرزمین دوسرے ملک کے خلاف دہشت گردی کے لیے استعمال ہو رہی ہو اور وہاں کی حکومت ان عناصر کو روکنے میں ناکام رہے یا عدم دلچسپی کا مظاہرہ کرے، تو متاثرہ ریاست کے پاس محدود اور ہدفی کارروائی کا اختیار موجود ہوتا ہے۔ پاکستان کی جانب سے کی گئی فضائی کارروائیاں اسی اصول کے تحت تھیں، جن کا مقصد کسی ملک کی خودمختاری کو چیلنج کرنا نہیں بلکہ دہشت گرد نیٹ ورکس کو غیر مؤثر بنانا تھا۔
پاکستانی سکیورٹی اداروں نے حالیہ عرصے میں انٹیلی جنس بیسڈ آپریشنز کی تعداد میں نمایاں اضافہ کیا ہے۔ ان کارروائیوں کی کامیابی کا انحصار جدید ٹیکنالوجی، مقامی آبادی کے تعاون اور اداروں کے درمیان مؤثر رابطے پر ہے۔ پاک فوج اور دیگر قانون نافذ کرنے والے اداروں نے نہ صرف دہشت گردوں کے بڑے نیٹ ورکس کو توڑا بلکہ ان کے مالی وسائل اور سہولت کاروں کو بھی بے نقاب کیا۔ یہ ایک ہمہ جہت حکمتِ عملی ہے جس میں سرحدی نگرانی، باڑ کی تنصیب، جدید نگرانی کے آلات اور فوری ردِعمل کی صلاحیت شامل ہے۔

پاکستان اور افغانستان کے درمیان سرحد طویل اور دشوار گزار ہے۔ اس خطے کی جغرافیائی پیچیدگی دہشت گردوں کو نقل و حرکت کے مواقع فراہم کرتی رہی ہے۔ اسی تناظر میں پاکستان نے سرحدی باڑ کی تکمیل کو ترجیح دی، نئی چیک پوسٹس قائم کیں اور سرحدی گزرگاہوں کو دستاویزی نظام کے تحت لایا۔ ان اقدامات کا مقصد عام شہریوں کی آمدورفت کو منظم کرنا اور غیر قانونی دراندازی کو روکنا ہے۔ اگرچہ بعض حلقوں نے اس پر اعتراضات اٹھائے، لیکن زمینی حقائق نے ثابت کیا کہ مؤثر بارڈر مینجمنٹ دہشت گردی کی روک تھام میں کلیدی کردار ادا کرتی ہے۔
یہ امر بھی قابلِ غور ہے کہ دہشت گردی محض عسکری مسئلہ نہیں بلکہ ایک نظریاتی اور سماجی چیلنج بھی ہے۔ پاکستان نے نیشنل ایکشن پلان کے تحت شدت پسندی کے بیانیے کا توڑ کرنے، مدارس کی رجسٹریشن، نفرت انگیز تقاریر کے خلاف کارروائی اور کالعدم تنظیموں کی سرگرمیوں پر پابندی جیسے اقدامات کیے۔ تاہم جب بیرونی سرزمین سے منظم حملے جاری رہیں تو داخلی اقدامات کافی نہیں رہتے۔ اسی لیے سرحد پار موجود ٹھکانوں کو نشانہ بنانا ایک ناگزیر آپشن بن گیا۔
افغانستان کی موجودہ صورتِ حال بھی پیچیدہ ہے۔ برسوں کی جنگ نے وہاں کے سکیورٹی ڈھانچے کو کمزور کیا ہے۔ ایسے میں غیر ریاستی عناصر کو جگہ بنانے کا موقع ملا۔ پاکستان نے ہمیشہ ایک پرامن اور مستحکم افغانستان کی حمایت کی ہے کیونکہ دونوں ممالک کا امن ایک دوسرے سے جڑا ہوا ہے۔ لیکن امن کی خواہش کا مطلب یہ نہیں کہ پاکستان اپنی سلامتی پر سمجھوتہ کرے۔ حالیہ فضائی کارروائیاں محدود، مخصوص اور دہشت گردوں کے ٹھکانوں تک مرکوز تھیں، جن کا مقصد شہری آبادی کو نقصان پہنچانا نہیں تھا بلکہ ان عناصر کو پیغام دینا تھا کہ پاکستان اپنی سرزمین کے دفاع میں کسی تردد کا شکار نہیں ہوگا۔
ان اقدامات کے مثبت نتائج بھی سامنے آئے ہیں۔ کئی اہم کمانڈرز ہلاک ہوئے، اسلحے کے ذخائر تباہ ہوئے اور دراندازی کے منصوبے ناکام بنائے گئے۔ سب سے اہم بات یہ کہ سکیورٹی فورسز کا مورال بلند ہوا اور عوام کو یہ اعتماد ملا کہ ریاست ان کے جان و مال کے تحفظ کے لیے سنجیدہ ہے۔ دہشت گردی کے خلاف جنگ میں عوامی اعتماد ایک بنیادی ستون کی حیثیت رکھتا ہے۔ جب شہری دیکھتے ہیں کہ ریاست بروقت اور مؤثر ردِعمل دے رہی ہے تو وہ بھی تعاون کے لیے آگے آتے ہیں۔
تاہم یہ بھی حقیقت ہے کہ عسکری کارروائی مستقل حل نہیں ہوتی۔ پائیدار امن کے لیے سفارتی روابط، انٹیلی جنس تعاون اور علاقائی ہم آہنگی ضروری ہے۔ پاکستان کو چاہیے کہ وہ عالمی برادری کو بھی اس مسئلے کی سنگینی سے آگاہ رکھے تاکہ افغانستان کی سرزمین دہشت گردوں کے لیے محفوظ پناہ گاہ نہ بنے۔ چین، وسطی ایشیائی ریاستیں اور دیگر علاقائی ممالک بھی دہشت گردی سے متاثر ہوتے ہیں، اس لیے مشترکہ حکمتِ عملی وقت کی ضرورت ہے۔
پاکستان کی خارجہ پالیسی کا بنیادی نکتہ ہمیشہ امن رہا ہے، مگر امن کمزوری سے نہیں بلکہ طاقت کے توازن سے قائم ہوتا ہے۔ اگر دشمن کو یہ احساس ہو کہ اس کی ہر جارحیت کا بھرپور جواب دیا جائے گا تو وہ مہم جوئی سے باز رہتا ہے۔ یہی اصول حالیہ اقدامات کی بنیاد ہے۔ یہ کارروائیاں نہ تو جنگ کا اعلان ہیں اور نہ ہی کسی ملک کے خلاف دشمنی کا اظہار، بلکہ ایک واضح پیغام ہیں کہ پاکستان کی سرزمین اور شہریوں کا تحفظ اولین ترجیح ہے۔
مستقبل کا راستہ دوہرا ہے: ایک طرف سرحدی نگرانی اور انٹیلی جنس آپریشنز کو مزید مضبوط بنانا، اور دوسری جانب سفارتی سطح پر ایسے اقدامات کو یقینی بنانا جو دہشت گرد گروہوں کی سرپرستی کا خاتمہ کریں۔ اگر افغانستان کی حکومت اپنی سرزمین کو دہشت گردی کے لیے استعمال ہونے سے روک دے تو دونوں ممالک کے تعلقات میں بہتری آ سکتی ہے۔ تجارت، راہداری اور عوامی روابط کے بے شمار امکانات موجود ہیں، مگر یہ سب اسی وقت ممکن ہے جب سرحد پار سے ہونے والی دہشت گردی کا مکمل سدباب ہو۔
پاکستان نے بارہا ثابت کیا ہے کہ وہ دہشت گردی کے خلاف جنگ میں سنجیدہ اور پْرعزم ہے۔ ہزاروں جانوں کی قربانی دے کر اس ملک نے امن کی قیمت ادا کی ہے۔ اب یہ کسی صورت قابلِ قبول نہیں کہ بیرونی سرزمین سے بیٹھ کر عناصر پاکستان کے امن کو یرغمال بنائیں۔ مؤثر عسکری اقدامات، مضبوط سفارتی حکمتِ عملی اور قومی یکجہتی ہی وہ ستون ہیں جن پر ایک محفوظ اور مستحکم پاکستان کی عمارت کھڑی ہو سکتی ہے۔ سرحد پار دہشت گردی کے خلاف حالیہ کارروائیاں اسی عزم کا عملی اظہار ہیں کہ ریاست اپنے دفاع میں ہر ضروری قدم اٹھائے گی اور دہشت گردی کے ناسور کو جڑ سے اکھاڑ پھینکنے تک اپنی کوششیں جاری رکھے گی۔

آج کے پاکستان میں سوشل میڈیا صرف رابطے کا ذریعہ نہیں رہا، یہ رائے سازی کا سب سے طاقتور ہتھیار بن چکا ہے۔ چند لمحوں میں کوئی ویڈیو، آڈیو کلپ یا تحریر لاکھوں لوگوں تک پہنچ جاتی ہے اور دیکھتے ہی دیکھتے ایک تاثر، ایک کہانی اور بعض اوقات ایک پورا بیانیہ تشکیل پا جاتا ہے۔ مسئلہ تب پیدا ہوتا ہے جب یہ بیانیہ سچ پر نہیں بلکہ افواہوں، آدھی معلومات اور جذباتی ہیجان پر مبنی ہو۔ ایسی صورت میں قومیں کنفیوژن کا شکار ہو جاتی ہیں اور ریاستی و سماجی استحکام متاثر ہوتا ہے۔
پاکستان جیسے ملک میں، جہاں سیاسی درجہ حرارت اکثر بلند رہتا ہے اور معاشی و سیکیورٹی چیلنجز مستقل موجود ہیں، وہاں اطلاعات کی ذمہ داری اور بھی بڑھ جاتی ہے۔ مگر بدقسمتی سے ہمارے ہاں سوشل میڈیا اکثر تصدیق کے بجائے سنسنی کو ترجیح دیتا ہے۔ کسی واقعے کی مکمل تصویر سامنے آنے سے پہلے ہی اس پر تبصرے، تجزیے اور فیصلے صادر ہو چکے ہوتے ہیں۔ ایک غیر مصدقہ ٹویٹ یا ایڈیٹ کی گئی ویڈیو پورے معاشرے میں بے یقینی پھیلا دیتی ہے۔
افواہ کی نفسیات بہت سادہ ہے، لوگ وہی بات تیزی سے مانتے اور پھیلاتے ہیں جو ان کے پہلے سے موجود تعصبات یا جذبات سے مطابقت رکھتی ہو۔ اگر کوئی خبر ہمارے پسندیدہ سیاسی رہنما کے حق میں ہو تو ہم اسے بغیر تحقیق کے آگے بڑھا دیتے ہیں، اور اگر مخالف کے خلاف ہو تو مزید جوش سے شیئر کرتے ہیں۔ اس عمل میں سچ کہیں پیچھے رہ جاتا ہے اور قوم کا اجتماعی شعور تقسیم در تقسیم ہوتا چلا جاتا ہے۔
قومی بیانیہ دراصل وہ مشترکہ فہم ہے جس پر ایک قوم کھڑی ہوتی ہے۔ یہ بیانیہ محض حکومتی موقف کا نام نہیں بلکہ عوامی سوچ، تاریخی تجربات اور اجتماعی مفادات کا مجموعہ ہوتا ہے۔ جب سوشل میڈیا پر مسلسل متضاد اور غیر ذمہ دارانہ اطلاعات گردش کرتی رہیں تو یہ مشترکہ فہم کمزور پڑنے لگتا ہے۔ ہر گروہ اپنا الگ سچ تراش لیتا ہے اور یوں معاشرہ چھوٹے چھوٹے معلوماتی جزائر میں تقسیم ہو جاتا ہے۔
پاکستان میں حالیہ برسوں کے دوران ہم نے دیکھا کہ کس طرح بعض افواہوں نے فوری طور پر عوامی ردعمل کو بھڑکا دیا۔ کبھی کسی گرفتاری کی غلط خبر، کبھی کسی اہم عہدے دار کے بارے میں بے بنیاد دعویٰ، اور کبھی کسی بین الاقوامی سازش کا مبالغہ آمیز بیانیہ ،یہ سب لمحوں میں وائرل ہوا اور بعد میں یا تو تردید آ گئی یا حقیقت اس سے مختلف نکلی۔ مگر تب تک نقصان ہو چکا ہوتا ہے۔ اعتماد ایک بار مجروح ہو جائے تو اسے بحال کرنا آسان نہیں رہتا۔
یہ کہنا بھی درست نہیں ہوگا کہ سارا قصور عوام کا ہے۔ ہمارے روایتی میڈیا، سیاسی قیادت اور بعض سرکاری اداروں کی غیر شفافیت بھی افواہوں کے پھیلاؤ میں کردار ادا کرتی ہے۔ جب بروقت اور واضح معلومات فراہم نہیں کی جاتیں تو خلا پیدا ہوتا ہے، اور معلومات کا یہ خلا افواہوں کے لیے زرخیز زمین بن جاتا ہے۔ لوگ قیاس آرائیوں سے اس خلا کو پْر کرتے ہیں۔ اس لیے ذمہ داری دو طرفہ ہے معلومات فراہم کرنے والوں کی بھی اور انہیں قبول کرنے والوں کی بھی۔

سوشل میڈیا کی ایک اور پیچیدگی اس کا الگورتھم ہے۔ یہ ہمیں وہی مواد دکھاتا ہے جو ہماری پسند اور رجحان سے میل کھاتا ہو۔ یوں ہم ایک ایسے ڈیجیٹل کمرے میں بند ہو جاتے ہیں جہاں صرف ہماری آواز کی بازگشت سنائی دیتی ہے۔ مخالف رائے یا تو نظر نہیں آتی یا دشمنی محسوس ہوتی ہے۔ اس ماحول میں افواہ سچ سے زیادہ کشش رکھتی ہے کیونکہ وہ ہمارے جذبات کو تسکین دیتی ہے۔
قومی بیانیے کے حوالے سے سب سے بڑا خطرہ یہ ہے کہ جب ہر خبر کو سازش، ہر اختلاف کو غداری اور ہر تنقید کو دشمنی سمجھا جانے لگے تو معاشرہ مکالمے کی صلاحیت کھو دیتا ہے۔ پاکستان کی تاریخ گواہ ہے کہ ہم نے داخلی تقسیم کی قیمت کئی بار چکائی ہے۔ ایسے میں سوشل میڈیا پر غیر ذمہ دارانہ طرزِ گفتگو، کردار کشی اور الزام تراشی نہ صرف سیاسی ماحول کو زہریلا بناتی ہے بلکہ ریاستی اداروں پر عوامی اعتماد کو بھی کمزور کرتی ہے۔
اس کا مطلب یہ نہیں کہ سوشل میڈیا کو خاموش کر دیا جائے یا اختلاف رائے کو دبایا جائے۔ درحقیقت سوشل میڈیا نے عام شہری کو آواز دی ہے، جس کے ذریعے وہ ناانصافی کے خلاف بول سکتا ہے اور اہم معاملات پر بحث کر سکتا ہے۔ مسئلہ آزادی اظہار نہیں بلکہ اس آزادی کے ساتھ جڑی ذمہ داری ہے۔ آزادی اور ذمہ داری کا توازن ہی ایک صحت مند معاشرے کی بنیاد ہے۔
حل کہاں سے شروع ہو؟ سب سے پہلے ہمیں بطور شہری اپنی عادتیں بدلنی ہوں گی۔ کسی بھی خبر کو آگے بڑھانے سے پہلے اس کا ذریعہ دیکھنا، تاریخ چیک کرنا اور کم از کم دو مستند ذرائع سے تصدیق کرنا ایک بنیادی اصول ہونا چاہیے۔ اگر خبر جذبات بھڑکا رہی ہو تو مزید احتیاط کی ضرورت ہے۔ اکثر جھوٹی خبریں اسی انداز میں پیش کی جاتی ہیں کہ قاری فوری ردعمل دے۔
دوسری جانب ریاست اور میڈیا اداروں کو شفافیت اور بروقت معلومات کی فراہمی کو یقینی بنانا ہوگا۔ جب عوام کو صحیح وقت پر درست معلومات ملیں گی تو افواہوں کی گنجائش کم ہو جائے گی۔ پریس بریفنگ، ڈیٹا کی دستیابی اور واضح پالیسی بیانات اعتماد سازی میں مددگار ثابت ہو سکتے ہیں۔
تعلیم کا کردار بھی نہایت اہم ہے۔ ڈیجیٹل لٹریسی کو نصاب کا حصہ بنایا جانا چاہیے تاکہ نوجوان یہ سیکھ سکیں کہ آن لائن مواد کو کیسے پرکھا جاتا ہے، تصویر یا ویڈیو کی اصلیت کیسے جانچی جاتی ہے اور الگورتھمز کیسے کام کرتے ہیں۔ یہ دور محض پڑھنے لکھنے کا نہیں بلکہ معلومات کو سمجھنے اور جانچنے کا ہے۔
سیاسی قیادت کو بھی اپنے کارکنوں اور حامیوں کو ذمہ دارانہ طرزِ عمل کی تلقین کرنی چاہیے۔ اگر قیادت خود اشتعال انگیز زبان استعمال کرے گی تو کارکنان بھی وہی رویہ اپنائیں گے۔ قومی بیانیہ صرف نعروں سے نہیں بنتا، بلکہ برداشت، مکالمے اور سچائی کے احترام سے تشکیل پاتا ہے۔
آخر میں یہ سمجھنا ضروری ہے کہ سوشل میڈیا بذاتِ خود نہ دشمن ہے نہ نجات دہندہ۔ یہ ایک طاقتور ذریعہ ہے جس کا استعمال ہماری نیت اور شعور پر منحصر ہے۔ اگر ہم اسے افواہوں، نفرت اور تقسیم کے لیے استعمال کریں گے تو اس کے نتائج بھی ویسے ہی ہوں گے۔ لیکن اگر ہم اسے شعور، مکالمے اور مثبت بیانیے کے لیے بروئے کار لائیں تو یہی پلیٹ فارم قومی یکجہتی کا وسیلہ بن سکتا ہے۔
پاکستان کو اس وقت جس چیز کی سب سے زیادہ ضرورت ہے وہ اعتماد ہے عوام کا اداروں پر، اداروں کا عوام پر اور مختلف طبقات کا ایک
دوسرے پریہ اعتماد سچائی، شفافیت اور ذمہ دارانہ رویے سے ہی قائم ہو سکتا ہے۔ سوشل میڈیا کے اس دور میں ہر شہری محض صارف نہیں بلکہ ایک طرح کا ناشر بھی ہے۔ جو کچھ ہم لکھتے اور شیئر کرتے ہیں، وہ صرف الفاظ نہیں ہوتے بلکہ وہ قوم کے اجتماعی ذہن میں ایک اینٹ کا اضافہ کرتے ہیں۔
اگر ہم چاہتے ہیں کہ ہمارا قومی بیانیہ مضبوط، متوازن اور حقیقت پر مبنی ہو تو ہمیں افواہوں کے سیلاب کے آگے بند باندھنا ہوگا۔ یہ بند قانون سے زیادہ شعور سے تعمیر ہوگا۔ اور جب شعور بیدار ہو جائے تو افواہ اپنی کشش کھو دیتی ہے، کیونکہ سچ کی بنیاد مضبوط ہوتی ہے اور قومیں مضبوط بنیادوں پر ہی آگے بڑھتی ہیں۔