Blog

لاہور (کنزیومر واچ نیوز)صوبائی وزیرصنعت و تجارت چوہدری شافع حسین سے دیوان گروپ کے سی ای او وسیم الحق کی قیادت میں وفد نے ملاقات کی۔پیسک ہاؤس میں ہونے والی ملاقات میں پنجاب کے سپیشل اکنامک زونز میں سرمایہ کاری کے مواقع پر بات چیت ہوئی۔ دیوان گروپ نے پنجاب کے خصوصی اقتصادی زون میں الیکٹرک وہیکلز کا اسیمبلنگ پلانٹ لگانے کا عندیہ دے دیا۔اس موقع پر سی ای او دیوان گروپ وسیم الحق نے کہاکہ ہمارا گروپ کراچی میں مختلف قسم کی گاڑیاں تیار کر رہا ہے۔ پنجاب میں بھی اپنا صنعتی یونٹ لگانا چاہتے ہیں۔ صوبائی وزیر صنعت و تجارت چوہدری شافع حسین نے اس موقع پر گفتگو کرتے ہوئے کہا کہ وزیر اعلیٰ پنجاب کا فوکس صوبے میں ای وی سیکٹر کا فروغ ہے۔صنعتی یونٹ لگانے کیلئے سپیشل اکنامک زون میں قابل توسیع 30 سال کی لیز پر اراضی حاصل کی جاسکتی ہے۔ صوبائی وزیر صنعت و تجارت چوہدری شافع حسین نے کہاکہ دیوان گروپ پنجاب میں وہیکلز کا اسمبلنگ پلانٹ لگائے، ہرممکن سہولت دیں گے۔چاہتے ہیں کہ پنجاب میں ای وی چارجنگ کے اسیمبلنگ پلانٹ بھی لگیں۔ صوبائی وزیرصنعت و تجارت نے دیوان گروپ کی تیار کردہ گاڑیوں کا مشاہدہ کیا،گاڑی خود ڈرائیو کرکے جائزہ لیا۔ پنجاب سرمایہ کاری بورڈ کے ڈائریکٹر ڈاکٹر عمران ہاشمی بھی ملاقات میں موجود تھے۔وفد میں دیوان گروپ کے ڈائریکٹر،سیلز مینجر،سروس مینجر اور گروپ کے دیگر حکام بھی شامل تھے۔

کراچی(کنزیومر واچ نیوز)یاماھا موٹر پاکستان (پرائیویٹ) لمیٹڈ نے باضابطہ طور پر اعلان کیا ھے کہ وہ ملک میں موٹر سائیکل کی پیداوار بند کر رہا ھے۔ کراچی کے بن قاسم انڈسٹریل پارک سے جاری کردہ اعلامیے کے ذریعے کمپنی نے اپنے ڈیلرز کو آگاہ کیا کہ یہ فیصلہ یاماھا موٹر کمپنی، جاپان کی پالیسی تبدیلی کے نتیجے میں کیا گیا ھے۔کمپنی کی جانب سے جاری اعلان کے مطابق مقامی پیداوار کو ختم کر کے مرحلہ وار کاروباری سرگرمیوں سے مکمل انخلا کیا جا رہا ھے۔ یہ فیصلہ پاکستانی مارکیٹ میں قیمتوں کے توازن میں مشکلات، اور پالیسی میں تبدیلی کے باعث کیا گیا ھے۔جاری کردہ خط میں واضح کیا گیا ھے کہ کمپنی تمام نئی پیداوار بند کر رہی ھے اور صرف موجودہ اسٹاک کے مطابق ڈیلرز کو موٹر سائیکل کی فراہمی جاری رکھے گی۔صرف ان ڈیلرز کو جو اپنے بقایاجات کی ادائیگی کر چکے ہوں، معاہدے کی مدت مکمل ہونے تک انہیں سپلائی جاری رھے گی، کسی نئے آرڈر کو قبول نہیں کیا جائے گا جب تک کہ بقایا جات مکمل ادا نہ کیے گئے ہوں۔یہ اقدامات اس بات کی علامت ہیں کہ یاماھا جلد ہی پاکستان میں اپنی موجودگی ختم کر دے گا۔کمپنی نے یہ بھی یقین دہانی کروائی ہے کہ موجودہ یاماھا موٹر سائیکل صارفین کے لیے اسپئیر پارٹس کچھ مدت تک دستیاب رہیں گے تاکہ سروس اور مرمت کے مسائل نہ ہوں۔اسی طرح، تمام موٹر سائیکلوں کی وارنٹی چاہے وہ ڈیلر کے پاس موجود ہوں یا منتقلی کے مرحلے میں ہوں کمپنی کی موجودہ وارنٹی اسکیم کے مطابق فعال رہے گی۔ فیکٹری میں مناسب تعداد میں پارٹس کا ذخیرہ بھی رکھا جائے گا تاکہ صارفین کو بروقت سروس فراہم کی جا سکے۔یہ اعلان پاکستان میں یاماھا کے ایک دور کے اختتام کی نشاندہی کرتا ھے اور ملک میں آٹو انڈسٹری کا نیا باب شروع ھو چکا ھے، جو کہ الیکٹرک وہیکلز کی مقامی پیداوار، اور پالیسی اصلاحات پر مبنی ھے۔

اسلام آباد(کنزیومر واچ نیوز)حکومت نے مجوزہ صنعتی پالیسی کے تحت صنعتی بجلی کے ٹیرف سے کراس سبسڈی ختم کرنے اور پیک ریٹس کو منسوخ کرنے کا فیصلہ کیا ہے تاکہ برآمدات میں اضافہ کیا جا سکے۔حکومت نے قوانین میں تبدیلی لانے کا بھی فیصلہ کیا ہے، جن میں ایک جامع انسالوینسی (دیوالیہ پن سے تحفظ) قانون متعارف کرانا شامل ہے۔ وزیرِاعظم کی سطح پر یہ طے پایا ہے کہ صنعتکاروں کو نیب، ایف آئی اے اور ایف بی آر کے براہِ راست رابطے سے محفوظ رکھا جائے گا۔اسی مقصد کے لیے ایس ای سی پی ایکٹ 1947 کی دفعہ 41-B اور دفعہ 42-A میں ترمیم کا فیصلہ کیا گیا ہے، جس کے تحت قانون نافذ کرنے والے اداروں کے لیے یہ لازمی ہوگا کہ وہ کسی بھی کارروائی سے قبل ایس ای سی پی کی اجازت حاصل کریں۔ترمیمی مسودے کے مطابق، ریگولیٹڈ اداروں کے خلاف انکوائری، تحقیقات یا کارروائی خواہ وہ اسٹاک ایکسچینجز ہوں، سینٹرل ڈپازٹریز، کلیئرنگ ہاؤسز، نان بینکنگ فنانس کمپنیاں (روایتی یا ڈیجیٹل)، انشورنس کمپنیاں یا بروکرز—بغیر ایس ای سی پی کے ریفرنس کے کسی وفاقی یا صوبائی تحقیقاتی ادارے کی طرف سے نہیں کی جا سکے گی۔ اس کے علاوہ اگر کوئی معاملہ پہلے ہی ایس ای سی پی کے سامنے ہو تو کسی بھی دوسرے ادارے کے پاس اس پر کارروائی کا اختیار نہیں ہوگا۔ترمیمی مسودہ غیر ملکی سرمایہ کاروں (بشمول نائیکوپ ہولڈرز) کو بھی واضح قانونی تحفظ فراہم کرتا ہے تاکہ بیرونی اداروں کی من مانی مداخلت سے بچاؤ یقینی بنایا جا سکے۔حکومتی ذرائع نے دی نیوز کو بتایا کہ”پاور ڈویژن صنعتی بجلی کے ٹیرف سے کراس سبسڈی ختم کرے گا اور پیک ریٹس بھی منسوخ کرے گا۔”مجوزہ صنعتی پالیسی کا مسودہ جلد جاری ہونے والا ہے۔ اس کے مطابق، وزارتِ تجارت نے وزارتِ خزانہ کی مشاورت اور وفاقی کابینہ کی منظوری سے برآمد کنندگان کے لیے مقامی ٹیکس و لیویز کے ڈرا بیک (DLTL) اسکیم شروع کرنے پر اتفاق کیا ہے۔ایف بی آر نے بھی اربوں روپے کے پھنسے ہوئے ریفنڈز کی ادائیگی کا فیصلہ کیا ہے، جن میں سیلز ٹیکس (موخر ریفنڈ پیمنٹ آرڈرز ، کسٹمز ریبیٹس، انکم ٹیکس اور صوبائی ٹیکس شامل ہیں۔ سیلز ٹیکس ریفنڈز بروقت ادا کیے جائیں گے اور وقت کے ساتھ ساتھ اس عمل کو مزید تیز بنایا جائے گا۔