شیخوپورہ:(کنزیومر واچ نیوز) وفاقی وزیر برائے غذائی تحفظ و تحقیق رانا تنویر حسین کا کہنا ہے کہ پاکستان کی خارجہ پالیسی کی وجہ سے اسرائیل اقوام متحدہ کی سلامتی کونسل میں معافی مانگنے پر مجبور ہوا۔میڈیا سے گفتگو کرتے ہوئے رانا تنویر حسین کا کہنا تھا قطر پر حملہ اسرائیلی منافقت کا آخری درجہ ہے، اسرائیلی حملے کے باوجود جیل میں بند عالم اسلام کا نام نہاد لیڈر ایک لفظ نہ کہہ سکا۔انہوں نے کہا کہ پی ٹی آئی کی سیاست پاکستانی مفادات کے خلاف ہے، خیبر پختونخوا میں بڑھتی ہوئی دہشت گردی کی وجہ بانی پی ٹی آئی کے اقدامات ہیں۔سعودی عرب کے ساتھ ہونے والے دفاعی معاہدے کے حوالے سے وفاقی وزیر کا کہنا تھا سعودیہ سے ہمارا جذباتی رشتہ ہے، ہمارا بچہ بچہ حرمین الشریفین کی حفاظت کے لیے تیار ہے۔رانا تنویر حسین کا کہنا تھا ہمارا ایٹمی پروگرام اپنی حفاظت اور عوام کی فلاح کے لیے ہے، ہماری خارجہ پالیسی نے سلامتی کونسل میں اسرائیل کو معافی مانگنے پر مجبور کر دیا۔پنجاب میں سیلاب کی تباہ کاریوں سے متعلق سوال پر رانا تنویر حسین کا کہنا تھا وزیر اعلیٰ پنجاب سیلاب متاثرین کی بحالی تک چین سے نہیں بیٹھیں گی، گندم کی بہتر پیداوارکے لیے شاندار کسان پیکج لا رہے ہیں۔
Blog
-
60 ہزار سے زائد جیولرز کا ڈیٹا اکٹھا کرلیا، ٹیکس شکنجہ کسنے کا فیصلہ
لاہور:(کنزیومر واچ نیوز) فیڈرل بورڈ آف ریونیو (ایف بی آر) نے جیولرز پر شکنجہ کسنے کے لیے 60 ہزار سے زائد جیولرز کا ڈیٹھا اکٹھا کرلیا۔ذرائع کے مطابق جن 60 ہزار جیولرز کا ڈیٹا جمع کیا گیا ان میں سے صرف 21 ہزار جیولرز ایف بی آر کے ساتھ رجسٹرڈ ہیں اوران 21 ہزار رجسٹرڈ جیولرز میں سے بھی صرف 10 ہزار 524 نے ٹیکس ریٹرن داخل کی ہیں۔ ذرائع ایف بی آر نے بتایا کہ بیشتر جیولرز اپنی آمدنی کم ظاہر کرکے ٹیکس چھپا رہےہیں، ٹیکس چھپانے والے جیولرز کے خلاف کارروائی شروع کی جا رہی ہے جس کے لیے پہلے مرحلے میں پنجاب کے 900 جیولرز کی فہرست تیار کر لی گئی ہے جن کا تعلق لاہور، راولپنڈی، فیصل آباد اور ملتان سے ہے۔ ذرائع کاکہنا ہےکہ ٹیکس ریٹرن ان کی دکانوں، خرید و فروخت اور رہن سہن کے مطابق نہیں، کئی ہزار جیولرز ٹیکس نیٹ میں شامل ہی نہیں ہو رہے، ٹیکس کم دینے والے جیولرز سے نوٹسز کے ذریعے جواب طلب کیا جارہا ہے۔ اس حوالے سے ایف بی آر حکام نے کہا ہے کہ تمام سیکٹرز کو ٹیکس نیٹ میں لایا جا رہا ہے، کسی تاجر اور صنعت کار کو بلاوجہ نوٹس نہیں دیں گے، ہر فرد اپنے حصے کا ٹیکس ایمانداری سے دے گا تو ملک چلے گا۔
-
فخر زمان کامتنازع آؤٹ، پاکستان نے ٹی وی امپائر کی شکایت کردی
دبئی:(کنزیو مر واچ نیوز) پاکستان ٹیم نے بھارت کے خلاف میچ میں فخر زمان کے متنازع آؤٹ پر آئی سی سی سے ٹی وی امپائر کی شکایت کردی۔ ایشیا کپ میں گزشتہ روز ہونے والے پاک بھارت میچ میں ٹی وی امپائر کی جانب سے فخر زمان کامتنازع آوٹ دیا گیا جس پر پاکستان کرکٹ ٹیم کے منیجر نوید اکرم چیمہ نے میچ کے بعد اپنے تحفظات سے میچ ریفری اینڈی پائی کرافٹ کو آگاہ کیا۔ذرائع کا بتانا ہے کہ میچ کے بعدکپتان کی میچ رپورٹ میں بھی پاکستانی ٹیم انتظامیہ نے متنازع فیصلے کا ہائی لائٹ کیا ہے جب کہ آئی سی سی کے امپائرز اور منیجرکو بھی ٹیم انتظامیہ نے اپنے تحفظات ظاہر کرتے ہوئے باضابطہ شکایت کردی ہے۔ ذرائع کے مطابق اہم ترین میچ میں ٹی وی امپائر کے فرائض سری لنکا کے روچیرا پالیاگروگے نے انجام دیے، انہوں نے فخر زمان کو متنازع انداز میں کاٹ بی ہائینڈ قرار دیا اور اس فیصلے سے میچ میں پاکستانی ٹیم کی پوزیشن متاثر ہوئی۔ اس حوالے سے پاکستان کے کپتان سلمان علی آغا نے پریس کانفرنس میں کہا تھا کہ فخر زمان کا آؤٹ شاید غلط تھا مگر امپائرز ہی فیصلہ کرتے ہیں، ہمیں لگا گیند زمین پر لگی مگر فیصلہ امپائر کا ہی ہوتا ہے۔
-
چینل 5 اور میٹرو ون نیوز کے چیئرمین خالد آرائیں اسپتال میں زیر علاج
کراچی(کنزیومرواچ نیوز) چینل 5 اور میٹرو ون نیوز کے چیئرمین خالد آرائیں کراچی کے ایک نجی اسپتال میں زیرِ علاج ہیں۔ اہلِ خانہ اور قریبی ذرائع نے ان کی صحت میں بہتری کے لیے عوام سے دعا کی اپیل کی ہے۔دوستوں نے دعا کی ہےکہ اللہ تعالیٰ انہیں صحتِ کاملہ و عاجلہ عطا فرمائے اور ہمیشہ خوش و آباد رکھے۔
-
سابق وفاقی سیکریٹری فنانس ڈویژن ڈاکٹر وقار مسعود خان ہفتہ کو انتقال کرگئے
اسلام آبا د (کنزیو مر واچ نیوز)سابق وفاقی سیکریٹری برائے فنانس ڈویژن ڈاکٹر وقار مسعود خان ہفتہ کو انتقال کرگئے۔وقار مسعود خان ایک ممتاز معیشت دان تھے وہ بزنس ریکارڈر میں کالم بھی لکھتے تھے جنہیں عوامی اور نجی شعبوں میں وسیع تجربہ حاصل تھا۔ایک پیغام میں وزیراعظم شہباز شریف نے معروف معیشت دان کی وفات پر افسوس کا اظہار کرتے ہوئے کہا کہ مرحوم ڈاکٹر وقار مسعود کی حکومت پاکستان کے لیے خدمات ہمیشہ یاد رکھی جائیں گی۔انہوں نے مزید کہا کہ اللہ تعالیٰ مرحوم کو جنت میں اعلیٰ مقام عطا فرمائے، آمین۔آئی کیپ کی ویب سائٹ پر دستیاب معلومات کے مطابق، وقار مسعود خان نے وفاقی حکومت میں کئی باوقار عہدوں پر خدمات انجام دیں، جن میں وزیر اعظم کے خصوصی سیکریٹری، سیکریٹری فنانس ڈویژن، سیکریٹری اقتصادی امور ڈویژن، سیکریٹری پیٹرولیم و قدرتی وسائل اور سیکریٹری ٹیکسٹائل انڈسٹری شامل ہیں۔اپنے کئی ادارتی اور ذاتی مطبوعات کے علاوہ، ڈاکٹر وقار مسعود خان نے معیشت سے سود (ربا) کے خاتمے کے موضوع پر دو کتابیں بھی تصنیف کیں۔انہوں نے متعدد ملکی اور بین الاقوامی مالی و بینکنگ اداروں کے بورڈ آف ڈائریکٹرز میں بھی خدمات انجام دیں، جن میں اسٹیٹ بینک آف پاکستان، نیشنل بینک آف پاکستان اور اسلامی ترقیاتی بینک شامل ہیں۔انہوں نے آئی ایم ایف، ورلڈ بینک اور ایشین ڈیولپمنٹ بینک میں پاکستان کے متبادل گورنر کے طور پر بھی نمائندگی کی۔
-
(میڈ اِن پاکستان) آئی ٹی سی این ایشیا 2025 میں وائپر گروپ بھرپور شرکت کرے گا
کراچی (اسٹاف رپورٹر) پاکستان کی سب سے بڑی انفارمیشن ٹیکنالوجی نمائش آئی ٹی سی این ایشیا 2025 23 سے 25 ستمبر تک ایکسپو سینٹر کراچی میں منعقد ہوگی۔ اس تین روزہ نمائش میں دنیا بھر کی نمایاں کمپنیوں کے ساتھ ساتھ مقامی ادارے بھی اپنی جدت اور مصنوعات پیش کریں گے۔نمائش میں وائپر گروپ اپنے ذیلی اداروں وائپر ٹیکنالوجی، ویژن ٹیکنالوجی اور وائپر اکیڈمی کے تعاون سے شرکت کرے گا۔ اس موقع پر گروپ کی جانب سے جدید ترین اے آئی پی سیز، مقامی طور پر تیار کردہ ہارڈویئر، جدید سافٹ ویئر ایپلی کیشنز اور اسکل ڈویلپمنٹ پروگرامز متعارف کرائے جائیں گے۔اس سال نمائش کا مرکزی موضوع “ٹیکنالوجی، میڈ اِن پاکستان” رکھا گیا ہے، جس کے تحت ملک میں تیار کی جانے والی آئی ٹی مصنوعات اور خدمات کو عالمی معیار پر اجاگر کرنے کا عزم کیا گیا ہے۔وائپر گروپ کے ترجمان نے کہا کہ ادارے کا مقصد ایک ایسا خود کفیل ڈیجیٹل پاکستان تشکیل دینا ہے جو خطے ہی نہیں بلکہ عالمی سطح پر بھی مقابلہ کر سکے۔نمائش میں شرکاء اور معزز مہمانوں کو دعوت دی گئی ہے کہ وہ ہال نمبر 1 میں قائم وائپر کے اسٹال پر آ کر براہِ راست دیکھ سکیں کہ پاکستان کس طرح ٹیکنالوجی کے میدان میں آگے بڑھ رہا ہے۔ اس موقع پر معزز وی آئی پی مہمانوں کے استقبال اور میزبانی کے خصوصی انتظامات بھی کیے گئے ہیں۔
-
پاک سعودی دفاعی معاہدے میں ایٹمی تحفظ شامل‘‘ عالمی میڈیا کی رپورٹ
اسلام آباد (کنزیومرواچ نیوز)عالمی خبر رساں ادارے نے اپنی رپورٹ میں پاکستان اور سعودی عرب کے درمیان ہونے والے حالیہ دفاعی معاہدے میں مشرق وسطیٰ کی سلامتی کےلیے ایٹمی تحفظ کے شامل ہونے کا اشارہ دیا ہے۔ مشرق وسطیٰ کے کئی عرب ممالک اسرائیل سے بڑھتے ہوئے خطرات محسوس کر رہے ہیں، ایسے میں اس ہفتے سعودی عرب اور پاکستان کے درمیان ہونے والے دفاعی معاہدے نے خطے کی سلامتی میں پاکستان اور اس کی ایٹمی طاقت کو ایک نئے زاویے سے شامل کردیا ہے۔بدھ کو طے پانے والے ’’اسٹریٹجک باہمی دفاعی معاہدے‘‘ کے تحت مبصرین کے مطابق ریاض کے مالی وسائل اور پاکستان کی ایٹمی صلاحیتوں سے لیس بڑی فوجی طاقت ایک دوسرے کے ساتھ جڑ گئی ہے۔ابھی معاہدے کی تفصیلات محدود ہیں، اور پاکستان کا سرکاری مؤقف یہی ہے کہ اس کا ایٹمی پروگرام صرف روایتی حریف بھارت کے خلاف ہے۔ تاہم، ریاض کے اشاروں سے اندازہ ہوتا ہے کہ اس معاہدے کے ذریعے وہ ایک طرح کا ’’ایٹمی ڈھال‘‘ حاصل کررہا ہے۔
-
حج درخواست گزاروں کا ذاتی ڈیٹا ڈارک ویب پر اپلوڈ ہونے کا انکشاف
اسلام آباد:(کنزیومر واچ نیوز)سینیٹ کی قائمہ کمیٹی برائے انفارمیشن ٹیکنالوجی کو بتایا گیا کہ ہیکرز نے 3 لاکھ 50 ہزار حج درخواست گزاروں کا ذاتی ڈیٹا ڈارک ویب پر اپلوڈ کر دیا ہے، جس پر اراکین پارلیمنٹ نے شدید تشویش کا اظہارکیا۔کمیٹی اجلاس کی صدارت سینیٹر پلوشہ خان کر رہی تھیں، جنہوں نے معاملے کو “قومی سلامتی اور عوامی اعتماد” کامسئلہ قرار دیا۔ پاکستان ٹیلی کمیونیکیشن اتھارٹی (PTA) کے چیئرمین نے انکشاف کیا کہ متاثرہ افراد میں 2026 کے حج کیلیے درخواست دینے والے شہری بھی شامل ہیں۔انھوں نے کہا کہ تحقیقات جاری ہیں تاکہ اس بات کا تعین کیا جا سکے کہ یہ نیا ڈیٹا لیک ہے یا 2022 کے لیک سے منسلک ہے۔ کمیٹی کو بتایا گیا کہ حج درخواست گزاروں کے علاوہ سم کارڈ صارفین کا ڈیٹا بھی متاثر ہوا ہے۔کمیٹی اراکین نے حکومت کی جانب سے طویل عرصے سے زیر التوا ڈیٹا پروٹیکشن بل پر عدم پیش رفت پر شدید برہمی کا اظہار کیا۔سینیٹر افنان اللہ نے کہا کہ “قانون جو اس ڈیٹا چوری کو روک سکتا ہے، وہی قانون ہمیں منظور نہیں کرنے دیا جا رہا ہے ۔”کمیٹی چیئرپرسن نے نیشنل سائبرکرائم ایجنسی (این سی سی اے) کی اہلیت پر بھی سوالات اٹھاتے ہوئے کہا کہ اتنی بڑی ذمہ داری نئی ایجنسی کو کیسے دی جا سکتی ہے؟ چیئرمین پی ٹی اے نے بتایا کہ وزارت داخلہ نے این سی سی اے کو تحقیقات کی قیادت سونپی ہے۔کمیٹی کے اراکین نے الیکشن کمیشن اور نادرا کے ڈیٹا کی سیکیورٹی پر بھی سوالات اٹھائے۔سینیٹر کامران مرتضیٰ نے خبردار کیا کہ ماضی میں پاک بھارت کشیدگی کے دوران ڈیٹا کا استعمال اسٹریٹجک ہتھیار کے طور پر کیا گیا تھا۔کمیٹی کو بتایا گیا کہ پی ٹی سی ایل اور ٹیلی نار کا انضمام آخری مراحل میں ہے اور ایک سے دو ہفتوں میں مکمل ہو جائیگا۔ 5G اسپیکٹرم نیلامی پر گفتگو کے دوران پی ٹی اے نے تکنیکی تیاری کی تصدیق کی، لیکن قانونی رکاوٹوں کا ذکر کیا۔کمیٹی نے Jazz کی جانب سے صارفین سے مبینہ طور پر 6 ارب روپے کی وصولی کے اسکینڈل کو پبلک اکاؤنٹس کمیٹی کے سپردکر دیا۔ آڈٹ حکام نے انکشاف کیا کہ Jazz نے مختلف پیکجز کی قیمتوں میں اضافہ کرکے صارفین سے بھاری رقوم وصول کیں۔کمیٹی نے موبائل نیٹ ورکس کی ناقص کارکردگی پر بھی تشویش کا اظہارکیا۔
-
ایشیا کپ: پاک بھارت میچ کیلئے ٹکٹس کی مانگ میں اضافہ، قیمت بڑھ گئی
دبئی (کنزیومر واچ نیوز)ایشیا کپ سپر فور مرحلے میں روایتی حریف پاکستان اور بھارت کے درمیان اگلا اہم میچ اتوار کو کھیلا جائے گا۔دنیائے کرکٹ کے بڑے ٹاکرے کے پیش نظر پاک بھارت سپر فور میچ کے ٹکٹس کی مانگ میں اضافہ ہوگیا ہے۔میچ کے لیے ٹکٹ کی کم سے کم قیمت ساڑھے 350 درہم یعنی تقریباً 27 ہزار پاکستانی روپے میں دستیاب ہیں۔ واضح رہے کہ اس سے قبل پاکستان اور بھارت کے میچ میں ہینڈ شیک کا تنازع سامنے آیا تھا جس میں میچ ریفری اینڈ پائیکرافٹ نے پاکستانی کپتان کو بھارت کپتان سے ہینڈ شیک کرنے سے منع کیا۔پاکستان کرکٹ بورڈ نے اس معاملے پر شدید احتجاج کرتے ہوئے آئی سی سی سے اینڈ پائیکرافٹ کو ہٹانے کا مطالبہ کیا تھا تاہم اینڈی پائیکرافٹ نے اس واقعے پر پاکستان کے کپتان سے معافی مانگ لی۔
-
حکومت کا اہم قدم، پاکستان میں انٹر نیٹ اسپیڈ تیز ہونے کا امکان
اسلام آباد(کنزیومرواچ نیوز) پاکستان میں آئندہ 12 سے 18ماہ کے دوران انٹر نیٹ کی رفتار تیز ہونے کا امکان ہے۔قومی اسمبلی کی قائمہ کمیٹی برائے آئی ٹی کے اجلاس میں وزارت انفارمیشن ٹیکنالوجی و ٹیلی کمیونیکیشن نے تصدیق کی ہے کہ آئندہ 12 سے 18 ماہ کے دوران پاکستان کو 3 نئے سب میرین کیبلز کے ذریعے عالمی نیٹ ورک سے منسلک کیا جائے گا، کمیٹی کو بتایا گیا کہ تینوں کیبلز کے معاہدے پہلے ہی طے پا چکے ہیں۔وزارتی حکام کے مطابق نئے سب میرین کیبلز پاکستان کو براہِ راست یورپ سے جوڑیں گی جس سے موجودہ محدود راستوں پر انحصار کم ہو گا اور ملک کا انٹرنیٹ انفرا اسٹرکچر مضبوط ہوگا، اس اقدام سے نہ صرف بین الاقوامی کنیکٹیویٹی بہتر ہوگی بلکہ آن لائن خدمات میں رفتار اور معیار میں بھی اضافہ متوقع ہے۔وزارت انفارمیشن ٹیکنالوجی و ٹیلی کمیونی کیشن کے سیکرٹری زرار ہاشم خان نے کہا کہ ان منصوبوں سے بینڈوڈتھ کی گنجائش میں نمایاں اضافہ ہوگا اور صارفین کے لیے ایک مستحکم اور قابل اعتماد انٹرنیٹ سروس کو یقینی بنائیں گے۔کمیٹی کے رکن صادق میمن نے حالیہ انٹرنیٹ مسائل پر سوال اٹھایا جس پر وزارت آئی ٹی نے یقین دہانی کرائی کہ نئے سب میرین کیبلز کی آمد سے طویل مدتی کنیکٹیویٹی کے مسائل حل ہوجائیں گے اور آن لائن خدمات میں بہتری آئے گی۔