لاہور (اسٹاف رپورٹر) پاکستان کی معروف اور سب سے زیادہ فروخت ہونے والی کمپیوٹر برانڈ وائپر ٹیکنالوجی نے اپنے پیداواری نیٹ ورک میں اہم توسیع کرتے ہوئے لاہور میں نئی اسمبلی فیکٹری کا آغاز کر دیا ہے، جس کے بعد ملک میں مجموعی پیداواری صلاحیت دوگنی ہو گئی ہے۔بین الاقوامی ریسرچ ادارے آئی ڈی سی کی 2025 کی دوسری سہ ماہی رپورٹ کے مطابق وائپر ٹیکنالوجی کو پاکستان کی نمبر ون پی سی برانڈ قرار دیا گیا ہے۔ لاہور میں فیکٹری کے قیام سے کمپنی کو شمالی علاقوں میں تیز تر سپلائی، مضبوط مارکیٹ کوریج اور جدید مصنوعات کی بڑے پیمانے پر تیاری کی سہولت حاصل ہو گی۔کمپنی کے ترجمان کے مطابق اس توسیع سے سینکڑوں براہِ راست اور بالواسطہ روزگار کے مواقع پیدا ہوں گے جبکہ اسیمبلنگ، تحقیق و ترقی (R&D)، نان ٹیکنیکل پارٹس مینوفیکچرنگ، مارکیٹنگ، پیکیجنگ اور سروس سپورٹ جیسے شعبے مکمل طور پر پاکستان میں ہی انجام دیے جائیں گے۔ترجمان نے کہا کہ مقامی سطح پر پیداوار بڑھانے سے قیمتی زرمبادلہ کی بچت اور درآمدی انحصار میں کمی ممکن ہو گی۔
وائپر کا یہ اقدام ڈیجیٹل خود کفالت اور صنعتی ترقی کے اس وژن کو مزید تقویت دیتا ہے جس کے تحت پاکستان کو کمپیوٹر مینوفیکچرنگ اور ایکسپورٹ کا علاقائی مرکز بنانے کا ہدف مقرر کیا گیا ہے۔
وائپر ٹیکنالوجی کا بڑا قدم ،لاہور میں نئی اسمبلی فیکٹری کا افتتاح
