اسلام آباد(کنزیومرواچ نیوز)امریکی میگزین دی ڈپلومیٹ نے پاکستان کو 2025 میں ایک بار پھر عالمی توجہ کا مرکز قرار دیتے ہوئے کہا ہے کہ یہ سال پاکستان کے لیے اسٹریٹجک واپسی، عسکری اعتماد اور ریاستی رٹ کی بحالی کا سال ثابت ہوا ہے۔میگزین کے مطابق پاکستان کی عسکری قیادت نے انتہا پسندی کے خلاف واضح، دوٹوک اور ریاستی سطح پر مضبوط پیغام دیا، جس میں یہ مؤقف نمایاں رہا کہ جہاد کے اعلان کا اختیار صرف ریاست کے پاس ہے۔ آرمی چیف کا یہ مؤقف نہ صرف انتہا پسندی کے خلاف ایک اہم سنگِ میل ثابت ہوا بلکہ اس نے ریاستی نظم و ضبط کو بھی مضبوط کیا۔رپورٹ کے مطابق مئی 2025 میں بھارت کے ساتھ ہونے والی فوجی جھڑپوں نے عالمی سطح پر بھرپور توجہ حاصل کی۔ محدود وسائل کے باوجود پاکستانی افواج کی مؤثر اور پیشہ ورانہ کارکردگی نے خطے میں عسکری توازن اور پاکستان کی ڈیٹرینس کو واضح کر دیا۔ بھارتی عسکری مہم جوئی کا بھرپور جواب دے کر پاکستان نے اپنی اسٹریٹجک ساکھ کو مزید مضبوط کیا، جسے عالمی دفاعی ماہرین نے سراہا۔دی ڈپلومیٹ لکھتا ہے کہ ان واقعات کے بعد پاکستان کی فوج ایک بار پھر عالمی عسکری مباحث کا مرکزی موضوع بن گئی، جبکہ پاکستان اور امریکا کے تعلقات میں بھی نمایاں بہتری دیکھنے میں آئی۔ اس کے برعکس، بھارت کے واشنگٹن کے ساتھ تعلقات پر دباؤ بڑھا۔رپورٹ میں مشرقِ وسطیٰ میں پاکستان کے بڑھتے ہوئے دفاعی کردار کا بھی ذکر کیا گیا ہے، جہاں سعودی عرب کے ساتھ بڑا باہمی دفاعی معاہدہ طے پایا، جس نے پاکستان کے علاقائی اثر و رسوخ کو مزید تقویت دی۔ پاکستانی دفاعی سازوسامان کی عالمی مانگ میں اضافہ ہوا، جبکہ چین نے جنگی حالات میں استعمال ہونے والے ہتھیاروں کی عملی کارکردگی پر اطمینان کا اظہار کیا۔میگزین کے مطابق سی پیک کے دوسرے مرحلے کے لیے سازگار عالمی ماحول پیدا ہوا، جبکہ غزہ سے متعلق عالمی کوششوں میں پاکستان کو ایک اہم فریق کے طور پر دیکھا گیا۔ افغانستان کے معاملے پر پاکستان نے مدلل اور واضح مؤقف اپنایا، ٹی ٹی پی کے خلاف پالیسی میں فیصلہ کن سختی کی گئی اور قطر، ترکیہ اور سعودی عرب کو ثالثی کردار میں شامل کر کے سرحد پار دہشت گردی کے خطرات کو عالمی سطح پر اجاگر کیا گیا۔دہشت گردی کے خلاف اندرونِ ملک نمایاں کامیابیوں کے ساتھ مختلف ممالک کے ساتھ تعاون میں بھی اضافہ ہوا۔ رپورٹ کے مطابق انتہا پسندی کے خلاف اقدامات اب محض بیانات نہیں بلکہ ایک واضح ریاستی پالیسی کی شکل اختیار کر چکے ہیں۔معاشی مشکلات کے باوجود اصلاحاتی عمل میں پیش رفت جاری رہی، جبکہ دو دہائیوں بعد پی آئی اے کی نجکاری کو ایک بڑی پیش رفت اور ممکنہ ٹرننگ پوائنٹ قرار دیا گیا ہے۔دی ڈپلومیٹ کے مطابق 2025 نے پاکستان کو عالمی فضا سے فائدہ اٹھا کر اصلاحات، اسٹریٹجک استحکام اور بین الاقوامی اعتماد کی بحالی کا ایک نادر موقع فراہم کیا ہے۔
2025 پاکستان کے عسکری اعتماد کا سال.امریکی میگزین “دی ڈپلومیٹ” کا اعتراف
